د روژه ماتي او پېشنمي پر وخت دې ټکو ته پام وکړئ!

ژباړه ـ ریاض مقامزی  

دا چې د روژې مبارکه میاشت ده؛ نو ښه به وي چې پر دې مهمو مسایلو پوه شئ او د روژه ماتي او پېشنمي پر مهال دغو ټکو ته پام وکړئ. پدې توګه به مو روغتيا تضمینه شي او له روغتيايي ستونزو سره به مخ نه شئ.

• له خرما، اوبو، شیدو، د مېوې تازه جوس، سوپ او يا ښوروا سره روژه ماته کړئ.

• په روژه ماتې کې فقط روژه ماته کړئ؛ ډوډۍ یو یا دوه ساعته وروسته وخورئ.

• له پاکټي او ګازي مشروباتو څخه ځان وساتئ.

• له حده ډېرې یخې اوبه مه څښئ.

• له اچار، چکني او نورو تروشو/مرچ لرونکو خوړو څخه استفاده مو معدې ته زیان رسولای شي.

• په آرامه خواړه وخورئ. ژر ژر خواړه خوړل ستاسو په زیان دي.

• سره کړي شیانو خوړل کم کړئ.

• په یو ځل ډېرې اوبه مه څښئ. هڅه وکړئ لږې ـ لږې اوبه وڅښئ، تر پېشنمی پورې د ۳ یا ۴ لېټره اوبو څښل کافي دي.

• د پېشنمي لپاره وخته پاڅېږئ ترڅو تاسو په بشپړ ډول ويښ شئ او معده مو هم خوړو ته اماده شي.

• د ورځې په اوږدو کې د تندې د مهارولو لپاره په پیشنمي کې خالصې اوبه ښه څښاک دي. له شربتونو او نورو مشروباتو ځان وساتئ.  

• په پیشمني کې د چای پر ځای غوره ده، چې له بادرنګو او هندواڼو خوړل خپل عادت کړئ.

• په پېشنمي کې لبنیات د خوړو لپاره ښه انتخاب کېدای شي.

• په ټوله کې د غوښو/کړایانو پر ځای سبزي او مېوو ته پخپل رژيم کې ځای ورکړئ.