ھائيکو نما نظم- ليک محمد الياس طوطه کان ملاکنډ خيبر پښتونخوا
ھائيکو نما نظم يا نظميه هائيکو
هسې خو په پښتو شاعرۍ کښې بلها قسمه نظمونه ليکلے شوي دي خو زما په خيال د ھائيکو په رنګ نظم پکښې تر اوسه چا نه دے ليکلے. ما غوښته چې په دغه اړه کار اوشي. او بيا زه په خپل کوشش کښې کامياب شوم او ھائيکو نما نظم مې په ۳ مئ ۲۰۱۰ کښې په بحيره عرب کښې هغه وخت اوليکلو کله چې ما په جھاز باندې نوکري کوله - او د خيره اوس زما د شاعرۍپه دويم کتاب کښې په کال ۲۰۲۲ کښې چاپ هم شو-
هيله لرم چې زمونږ ځلمي او د راتلونکي دور شاعران به په دغه اړه نور کار هم اوکړې . او د پښتو ادب دغه نوے قسمه نظم به په خپله شاعرئ کښې استعمال کړي.
مسلسل هائيکو ما په خپل اولني کتاب شور مي د قلم په ژبه راوله کښې په کال ۲۰۰۸ کښې هم چاپ ده
دغه هائيکو نما نظمونه يا نظميه هائيکوګاني څه داسې دي
۱- (هائيکو نما نظم )
نه راځي په بېرته تېر ساعت د ژوند
تا پکښې پردۍ ټپې وئيلې به
ځان ته چې د ځان د وېنا وخت ؤ نو
قصه مې د ويجاړ ګلشن راخستې ده
پريږدئ چې جذبې ځوانې راپارې کړم
ټپه شوم يه قربان د وينا وخت ؤ نو
داسې د غفلت ژوندون مې نه لګي
څنګ مې د دنيا کاروبار کړے وے
جمات کښې د اذان د وينا وخت ؤ نو
چا وے چې ضمير د دۀ اودۀ دے لا
الياس به د خوارانو اواز پورته کړو
خان ته چې د خان د وينا وخت ؤ نو
۱۳ مئ ۲۰۱۰ بحيره عرب
۲- ھائيکو نما نظم
زمونږ اصلي دشمنان دا خلق دي
څوک چې ډالر اخلي پښتون وژني
نو خدايه د هغو وزرې اوسيزه
هسې دعوے د مسيحا کوي خو
مونږ له په ګرانۍ ئې څرمن اوويسته
خدايه لږ د دو وزرې اوسيزه
زمکه ئې پرېښودې په هوا ګرځي
ستا په شانې زه هم ورته قار يمه
خدايه د ميږو وزرې اوسيزه
ورکه دې شي دغه ستړي خؤشي ده
درد چې داولس پکښې بيان نه شي
خدايه د زبيرګو وزرې اوسيزه
راغونډ چې د پښتون په بربادۍ شي نو
زه ئې په الوت خوشحاله نه يمه
خدايه د جرګو وزرې اوسيزه
ليک - محمد الياس