د کتابتون ډالۍ (۲)

لیکنه ـ ریاض مقامزی

له کتابتون ویبسايټ څخه د لیکنو دا لړۍ (د کتابتون ډالۍ) په دې خاطر پیل شوې، چې لوستونکي د ژوند ډېر مهم مسایل په ساده الفاظو کې زده کړي. ددې لړۍ دا لیکنه په یو حکایت سره پیلېږي.

وايي، یو هلک د کسب په زده کړې پسې ووت. استاذ ته یې وویل، غواړم په دې کار کې استاذ شم؛ نو څومره وخت ته اړتیا لرم. ویې ویل، درې کاله. 

هلک وویل، که شپه او ورځ پر ځان یوه کړم او ډېره خواري وکړم بیا به څومره وخت کې استاذ شم؟

ویې ویل:  شپږ کاله.

که کیسې ته ځیر شئ، هلک په دویمه پوښتنه کې د توقع خلاف ځواب ترلاسه کوي. عام باور دا دی، چې ډېره خواري به ښې پایلې ولري. مګر هيڅکله داسې نه ده.

انسان که ډېر کار وکړي او بېړه ولري، نو له ځينو ستونزو سره مخ کېږي، د همدغه ستونزو پر بنسټ کار سم نه شي زده کولای. ځينې یې دلته یادو:

ـ بې خوبي (د حافظې کمزورۍ، ذهني نا آرامۍ، فکري تمرکز د ختمېدو سبب کېږي.) 

ـ د فکري تمرکز بدلون (په عادي حالت کې تمرکز د کار په زده کړه وي، مګر په وارخطایئ کې دا حالت له اختلال سره مخ کېږي.)

ـ د هدف پر ځای پر وخت ډېر غور کېږي.

ـ په سرعت کې تعادل له منځه ځي. 

اوی خو به پوه شوي یې، چې باید په هيڅ کار کې بېړه و نه شي. خو په عادي او آرامه زړه کار کول، کومې ګټې لري؟ موږ یې درته وایو.

ـ خپل ټول پام به مو کار ته وي.

ـ د وخت پر ځای کار مهم دی. کله چې کار مهم وي، همدا معنا چې خپل وخت ته ارزښت ورکوئ.

ـ په کار کې تعادل رامنځته کېږي.

ـ ډېرو کوچنيو خو مهمو نقطو ته مو پام کېږي.

ـ له کاره به خوند اخلئ.

ـ هره ورځ به نوي مهارتونه زده کوئ.

نو د وروستي وړانديز په توګه ویلای شو، هيڅکله بېړۍ مه کوئ. هر څه کېږي خو وخت غواړي. که فکر مو کړی وی، کله چې تېز موټر تېر شي، اکثره خلک وايي دا به حتما ټکر کوي. همداسې په چټکۍ سره کار کول هم ستونرې زېږوي. 

خو داسې هم نه ده، چې تاسو دې بېخي بېغم اوسئ. سرعت، دقت او کیفیت ټول په پام کې نیسئ.