د جهنم تل؟
2,177
Riaz Muqamzai - ریاض مقامزی
2021-06-23 18:51:57
د یمن ختیځ المهرة ولایت په صحرا کې د (برهوت) په نامه د څا په اړه بېلابېلې افسانې او کیسې دي او خلک پر دې اند دي چې دا د پېریانو استوګنځی و.
فرانس پرېس اژانس په خپل رپوټ کې ویلي، باور دی چې د دغې لویې څا ژوروالی د ۱۰۰ تر ۲۵۰ مترو پورې دی او سور یې نژدې ۳۰ متره دی او له تل یې ډېر بد بوی راپورته کېږي.
یمني چارواکي لاهم نه پوهېږي چې د دې څا په تل کې څه دي.
د جیولوجي سیمو د ادارې او کانونو د شتمنیو د ادارې مشر صلاح بابحیر فرانس پرېس ته ویلي، اداره یې نه ده توانېدلې پوه شي چې د څا منځکې ۵۰ متره ژور څه دي، ځکه چې هلته په ښکته کېدو اکسیجن کمېږي.
دی زیاتوي: "د څا منځ کې مو ځینې ناشنا څیزونه او ډېر بد بوی حس کړل چې هېڅ پرې پوه نه شوو، هلته وضعیت ډېر بل ډول و."
د لمر وړانګې هم د څا تل ته نه رسېږي خو د څا له خولې یوازې ځینې مرغان ښکاري او بس.
د تېرو څو پېړیو په اوږدو کې، ګڼو خلکو داسې کیسې رانقل کړې چې ګنې هلته پېریان دي او ډېری خلک پر دې باور دي چې دا پېریان د ځمکې پر سر خطر پېښوي او ښايي "ټول خلک له ستوني" تېر کړي.
ان ځینې خلک د دغې ناڅرګندې څا په اړه له دې وېرې هېڅ هم نه وايي چې کوم زیان ورته ونه رسېږي.
بابحیر زیاتوي: "ددغو سیمو څېړنه او د څا تل ته - چې عمر یې څو میلیونه کاله اټکل شوی- رسېدل ضروري دي."
بي.بي.سي
