The Kerala Story
The Kerala Story
عمران اختر
په ۲۰۲۳ کال کې د کیرالا سټوري په نامه فلم پر سیمناوو خپور شو، چې په هند کې یې هنګامه جوړه کړه ځکه کله چې هم د مسلمانانو پر خلاف فلم جوړ شي حتمآ بلاکباسټر کیږي. د هندو دین څخه اسلام دین ته د یوې مسلمانې میرمن فاطمه اړوند دردناکه کیسه ده چې غوښتل یې نرسه شي خو د یو مسلمانې ډلې لخوا برینواش شي او د اسلام دین پرې ومنې. فاطمه سوریه ته د جهاد په خاطر ولیږل شي، او د داعش ډلې سره یوځای شي اما د نیول کیدلو وروسته د افغانستان زندان ته واچول شي.
فلم تاسې ته پریږدم که کتلای مو وي ښه ده او که نه مو وي کتلي درسره یې حتمآ اوګورئ. د فلم کیسه تاسې ته نه کوم، زه دلته د سیاست علم له پلوه ددې فلم اړوند مسایلو ته ستاسې توجو راجلبووم چې په دې فلم کې له کومو سیاسي اصطلاحاتو څخه استفاده شوي، او د حقوق او سیاسي علومو پوهنځي محصلینو ترڅنګ د سیاست مینه والو ته ګټور مفاهیم رانغاړي.
Islam-phobia: د اسلام یا مسلمانانو د دین په وړاندې ویره، کرکه، یا تعصب دی، په خاص ډول کله چې د تروریزم موضوع رابرسیره شي، نو لومړۍ اسلام او مسلمانانو ته د ترهګرۍ ګوته نیول کیږي. بالیوډ اکثره وخت د اسلام او مسلمانان په فلمونو کې د ترهګرۍ په رول کې راښکاره کوي.
Conspiracy Theory: د سازش تیوري هغه تیوري ده چې یوه ډله خلک په پټه توګه هڅه کوي چې یو چا ته زیان ورسوي یا یو څه ترلاسه کړي. د سازش تیوري دا په ګوته کوي چې مسلمان نارینه هندوانې ښځې د اسلام منلو لپاره د لالچ، د مینې په ذریعه ښکار کول، فریب، تښتونې، او د واده پر ذریعه په خپل دام کې راګیروي. په دې فلم کې یاده تیوري روښانه شوي ده چې یوه ډله خلک د اسلام په نوم هڅه کوي، انجوني برینواش کړي او سوریه ته یې د جهاد لپاره واستوي حالانکي همدا ډله غواړي چې اسلام او مسلمانان نړۍ ته ترهګر معرفی کړي.
Love Jihad: د لوف جهاد په اصل کې د اسلام فوبیک او سازش تیوري ده چې مسلمان نارینه د غیر مسلمو ټولنو میرمنې د مینې په پلمه د اسلام منلو لپاره په نښه کوي. د مينې جهاد يوه داسې مفکوره ده چې مسلمان نارينه په هند کې د مينې په ذریعه هندې انجونو سره واده کوي. لوف جهاد یوه غیر رسمي اصطلاح ده چې د افراطي هندې ډلو لخوا کارول کیږي. په دې فلم کې د مسلمانانو یوې ډلې لخوا هڅه شوي ده چې هندې انجونو سره مینه کیږي، ورو ورو براینواش کیږي او بیا واده ته اماده کیږي.
Hindutva: هندوتوا یوه معاصره سیاسي ایډیالوژي ده چې د هندوانو د برتری لپاره کار کوي، او هڅه کوي چې هند په اساسي قانون کې یو سیکولر دولت باندې بدل کړي، د هند اوسنې حکومت د هندوتوا ایديالوژۍ ښه مثال دي. د هندوتوا ایډیالوژي ډیری ډلې او افراد بدناموي، او هغه څوک چې د هندوتوا لوبغاري دي کله ناکله د خپلو اهدافو د ترلاسه کولو لپاره تاوتریخوالی ته لاره هواروي. مسلمانان اکثرآ د هغو کسانو اصلي هدف وي چې د هندوتوا ایډیالوژۍ طرفداران دي. په یاد فلم کې مسلمانان د هندوتوا ایډیالوژۍ ښکار شوی دي، چې په ټول فلم کې مسلمانان بدنام کړای شوي دي.
Patriarchy: یو ټولنیز نظام دی چې په دې کې د حاکمیت او امتیاز موقفونه په عمده توګه د نارینه وو په لاس کې وي. دا اصطلاح د کورنیو یا قبیلو لپاره کارول کیږي چې د پلار یا فامیل مشر یا نارینه لخوا کنټرول کیږي او د فیمینیزم تیوري برعکس نارینه په ښځو او ماشومانو باندې تسلط لري. په دې فلم کې یوه ډله خلک چې ځانونه مسلمانان ګڼې پر ښځو خپل حاکمیت څرګندوي.
War Propaganda: په ۱۹۲۵ کال کې اډولف هیټلر د MEIN KAMPF په نامه یو کتاب چاپ کړي دي چې ددې کتاب په یوه برخه کې د پروپاګند تخنیکونه ذکر شوي دي، دلته یې روښانه کوم: لومړي تخنیک: د خلکو د ساده کولو لپاره دومره غټ دروغ وویل شي چې خلک پخپله هم ورته حیرانه شي چې دومره غټ دروغ خو څوک نه وايي حتمآ یو څه رښتیا خو به وي! دوهم تخنیک: په دې تخنیک هماغه دروغ بار بار تکرار شي، ترڅو د خلکو یقین پرې لا باوري شي. دریم تخنیک: په دې تخنیک کې دا ښودل کیږي چې په مینځ مینځ کې لږ رښتیا هم وویل شي ځکه چې سپین دروغ په اسانۍ سره خلک پيژندلي شي، او د خلکو باور ورو ورو په حقیقت بدل شي. په دې فلم کې د داعش ډلې سره د افرادو یوځای کیدنه کې درست تعداد نه دې ښودل شوي، او د فاطمه په نوم ښځې اړوند کیسه په اصل کې ددې پروپاګند تخنیکونو څخه کار اخیستل شوي دي، ترڅو یو بل مذهبي جنګ ته لاره هواره کړي.