دا چې انسان ټولنيز موجود دی نو تل له نورو سره اړيکو ته اړتيا لري. په دې ډله کې ملګري هم له يوه ځانګړي ارزښت څخه برخمن دي. موږ او تاسو ټول له کورنۍ او خپلوانو وروسته، اړ یو چې له ځينو ملګرو سره هم اړيکې لرو. خو د ملګرو په ارزښت او د هغوی په ټاکلو کې د مهمو ټکو په اړه ډېر کم خلک پوهېږي. موږ دا لیکنه همدې موضوع ته ځانګړې کړې ده.
ملګري او پرمختګ
آيا پوهېږئ، چې څو کاله وروسته به په کوم موقف کې یئ!؟ ممکن تاسو و نه پوهېږئ، مګر دا ډېره آسانه خبره ده. یوازې خپل ملګري وګورئ، که ملګري مو ښه خلک وي تاسو به څو کاله وروسته خپل هدف ته رسېدلي یئ، خو که خبره برعکس وي او دوستان مو بد خلک وي نو پرته له شکه به په بد وضيعت کې ژوند کوئ. اوس پوښتنه دا ده، چې د کومو ځانګړنو درلودونکي خلک باید خپل ملګري وټاکو!؟ همدې پوښتنې ته مفصل ځواب درکوو.
لومړی ـ عیبونه
کوښښ وکړئ داسې ملګري وټاکئ، چې عیبونه مو برسېره کوي. البته په دې شرط، چې عیبونه مو باید تاسو ته ووايي، که برعکس ستاسو عیب نورو ته وايي له داسې خلکو ځان وساتئ. دا ډول خلک ستاسو شخصیت ننګوي او د نورو پر وړاندې مو سپک معرفي کوي.
موږ پښتانه متل کوو، چې "خپل عیب د ولو منځ د بل عیب د کلو منځ." رښتيا هم همداسې ده. انسان ته خپل عیب په اسانۍ نه معلومېږي. که تاسو نن کوم عیب لرئ او هېڅوک ستاسو عیب درته ښکاره نه کړي، نو څو کاله وروسته به مو دا عیب په عادت بدل شوی وي. تاسو ته دا بد عادت سم او مناسب کار ښکاري. مګر که ښه ملګري ولرئ او تاسو ته خپل عیب وښيي ډېر ژر به یې اصلاح کړئ. په دې ډول تاسو خپل ژوند کې له عیبونو پاک کېږئ او ډېر ژر د ټولنې منلي اشخاص جوړېدای شئ.
دویم ـ تشویق
که تاسو د ژوند په اوږدو کې ځينې کوچنۍ لاسته راوړنې لرئ، باید وستایل شئ. په دې توګه تاسو لا ډېره انرژي پيدا کوئ او لا زیاته هڅه کوئ. په افغانستان کې ډېری خلک دا کړنه نه ترسره کوي، بلکې ځينې وخت آن ستاسو د بریاوو پر وړاندې خنډ ګرځي او کينه هم کوي. یوه خبره باید تاسو هم درک کړئ. که د ښه ملګري دعوه کوئ باید خپل ملګري تل تشویق کړئ تر څو ستاسو د هڅوونې په پايله کې لا ډېر پرمختګ وکړي.
د هڅوونې بله ګټه دا ده، چې تاسو فکر کوئ ارزښتمن یئ او ملګري مو خوشحاله دي. کله چې تاسو ځانته په ټولنه کې د یوه ارزښتمن شخص په توګه قایل شوئ، په ټولنيز ژوند کې مو بریا حتمي کېږي.
درېيم ـ مشترک ارزښتونه
که څه هم فکري اختلاف له ډېرو اړخونو د انسان په فکري پياوړتيا کې مرسته کوي، مګر په ټوليزه توګه دا غوره ده، چې ګډ ارزښتونه ولرئ. که ستاسو ارزښتونه شریک وي نو ملګرتيا به مو تلپاتې وي. زموږ له ګډو ارزښتونو څخه هدف ستاسو هغه باورنه دي، چې تاسو ورته تل په ارزښت قايل یئ. دلته اساسي خبره دا ده، که تاسو داسې ملګري وټاکئ چې ارزښتونه مو سره په ټکر کې وي، تل به خپل ملګري له لاسه ورکوئ او ناهيلي به اوسئ.
خو که بیا هم ستاسو کوم ملګری په ارزښتونو کې له تاسو متفاوت وي، کوښښ وکړئ د هغه باورونو ته درنښت ولرئ، په دې توګه د خپلو ارزښتونو درناوی هم وساتئ.
څلورم ـ ګډې موخې
په چارو کې د مشورې لپاره ملګري تر ټولو غوره ټاکنه ده. که ستاسو موخه مشترکه وي نو ډېر ژر به خپله موخه ترلاسه کړئ. ومنئ چې "له یو لاس څخه ټک نه خېژي." که موخې ته د رسېدو لپاره پر یوې طرحې فکر کوئ نو ستاسو د ملګرو مختلفې نظریې به له تاسو سره د یوې عالي طرحې په جوړولو کې مرسته وکړي.
دا یو حقیقت دی، چې ستاسو ملګری تاسو تر ټولو ښه پېژندلی شي. که موخه مو ګډه وي، دواړه به ډېره هڅه کوئ او نوې تګلارې به سنجوئ.
پنځم ـ نېک انسانان
تر ډېره باید هڅه وکړئ، چې نېک خلک خپل ملګري وټاکئ. د انسان په کړو ـ وړو کې د ملګرو اغېز بېخي معلوم او ثابت دي. نو مهمه خبره ده، چې ښه خلک خپل ملګري وټاکئ تر څو تاسو هم ورسره مثبت بدلون وکړئ.
که ستاسو ملګري نشه کوي، باید پوه شئ، چې تاسو هم څه موده وروسته نشه یي کېږئ. په دې هکله باید قاطع دريځ ولرئ. له هر چا سره تر ملګرتيا وړاندې باید لومړی د مقابل لوري ټول خصلتونه وڅېړئ او بیا پرېکړه وکړئ.
