ویسټرن یونین څنګه کار کوي؟
لیکنه ـ ریاض مقامزی
پر کابل د تالبانو تر تسلط وروسته "ويسټرن یونین" شرکت د یوې خبرپاڼې په خپرولو سره په افغانستان کې د خپلو فعالیتونو د بندولو اعلان وکړ. دې چارې ګڼو هغو افغانانو ته اندېښنې پیدا کړې، چې د کورنۍ غړو یې له بهره ددوی مالي ملاتړ کاوه. خو له نېکه مرغه د حالاتو په لږ ښه کېدو سره دې شرکت د خپلو فعالیتونو د بیا پیل خبر ورکړ. تاسو به په دې لیکنه کې ددې شرکت په اړه لا ډېر پوه شئ.
ویسټرن یونین څه ډول شرکت دی؟
دا شرکت چې انګلېسي نوم یې "westernunion" دی، د پیسو د لېږد رالېږد یوه نړېواله کمپنۍ ده. د پیسو د انتقال ترڅنګ د پیسو تبادله او ځينې نورې مالي چارې او فعالیتونه هم پر مخ وړي. باید ووایم، چې په اکثرو ځایونو کې د "WU" په مخفف سره هم خپل شتون تائيدوي. ددې شرکت بنسټ په "۱۸۵۱ز" کال کې د "ازرا کورنل" له خوا کېښودل شو. "ازرا کورنل" د امریکا متحده ایالاتو یو لوی تجار او سیاسي شخصیت تېر شوی، چې د "ويسټرن یونین" شرکت سره ـ سره د "کورنل پوهنتون" بنسټګر هم دی. په اوس وخت کې ددې کمپنۍ مرکزي څانګه د امریکا محتده ایالاتو په "Denver, Colorado" کې موقعیت لري. په "۲۰۱۸م" کال کې یې د ټولو کارکوونکو شمېر شاوخوا "۱۲۰۰۰" تنو ته رسېده.
ویسټرن یونین څنګه کار کوي؟
لکه څنګه چې مو وړاندې یادونه وکړه، دا د پیسو د لېږد رالېږد يوه عالي کمپنۍ ده. ددې شرکت د تګلارې په مرسته خلک کولای شي، چې د نړۍ ګوټ ـ ګوټ ته د خپلو خپلوانو او ملګرو د مالي ملاتړ لپاره پیسې ولېږي. ددې چارې ګټه دا ده، چې په ډېر کم وخت او کم فیس سره کولای شئ، خپلو کورنيو او ملګرو ته پیسې ولېږئ او یا یې هم ترلاسه کړئ.
تګلاره
د پیسو لېږونکی باید د "ویسټرن یونین" شرکت یوې نږدې نمایندګۍ ته ورشي. د شرکت نماینده به د تذکرې په مرسته ستاسو معلومات ثبت کړي او ترڅنګ یې د هغه کس معلومات هم په دقیقه توګه اخلي چې تاسو ورته پیسې لېږئ. وروسته له دې چې تاسو پیسې او د پیسو فیس حواله کړئ، تاسو ته به یو ځانګړی لس عددیز کوډ درکړل شي. ترڅو د همدې کوډ په مرسته ستاسو پیسې اصلي کس ته په ډاډمنه توګه ورکړل شي.
تاسو باید دا کوډ هغه کس ته ولېږئ، چې پیسي ترلاسه کوي. د پیسو ترلاسه کوونکی له هماغه ځانګړي کوډ او خپلې تذکرې سره پخپل هېواد کې د "ویسټرن یونین" یوې نږدې نمیاندګۍ ته ورځي. هلته د خپل کوډ او معلوماتو په ورکولو سره خپلې پیسې ترلاسه کوي. باید یادونه وکړم، چې د پیسو له ترلاسه کوونکي هېڅ ډول فیس نه ګرځول کېږي. بلکې د پیسو د لېږلو فیس هم د پیسو له لېږونکي څخه اخیستل کېږي.