برج خلیفه؛ د نړۍ تر ټولو دنګه ودانۍ

ژباړه ـ ریاض مقامزی

په اوس وخت کې دوبۍ د نړۍ یو له پرمختللو ښارونو څخه ګڼل کېږي. ګڼو دنګو ودانيو ددې ښار ښکلا څو چنده کړې ده. د شپې له خوا بېلابېلو رڼاګانو د ښار هرې برخې ته ځانګړې ښکلا وربخښلې وي. دغه ښار د نړۍ د ترټولو دنګې ودانې کوربه هم دی. دغه ودانۍ "د خلیفه برج" نومېږي. په دې لیکنه کې به یې په اړه ډېر نوي څه ولولئ.

خلیفه برج

دغه برج په "۲۰۱۰" زیږديز کال کې افتتاح شو، چې د دوبۍ ښار یې لا مشهور کړ. په لومړیو کې د "دوبۍ برج" په نوم یادېده، خو د افتتاح په مراسمو کې یې نوم بدل کړای شو او "خلیفه برج" ونومول شو.

ددې برج په اړه لومړنی د پام وړ ټکی لوړوالی دی. په اوس وخت کې د ۸۲۸ متره لوړوالي په درلودلو سره د نړۍ تر ټولو هسکه ودانۍ بلل کېږي. ددې څلي لوړوالی د فرانسې دایفل برج په پرتله درې چنده زیات دی. دغه ودانۍ "۱۶۳" پوړه لري. "۲۹۵۷" د موټرو تم ځایونه او ۳۰۴ هوټلونه په کې موجود دي. ددې ترڅنګ ځينې نور ریکارډونه هم دې ودانۍ پخپل نوم ثبت کړي دي.

ریکارډونه

ـ په عمودي شکل د نړۍ تر ټولو دنګه ودانۍ

ـ د ډېرو منزلونو درلودونکې ودانۍ

ـ هغه ودانۍ چې تر ټولو ډېر خلک پکې ځايېږي

ـ هغه ودانۍ چې ډېر پارکينګونه لري

ـ د نړۍ تر ټولو دنګه ودانۍ

ځينې په زړه پورې حقیقتونه

ـ دغه ودانۍ پرته له دوربينه ددې ښار له هغو ساحو هم لیدلای شئ، چې د برج په ۹۵ کیلومترۍ کې پراته دي.

ـ د ودانۍ معمار امریکايي دی. آدرین سمیت نومېږي.

ـ د ودانۍ جوړېدو شپږ کاله وخت نیولی.

ـ تر بشپړېدو په کې ۱۲ زره کاریګرو کار کړی دی. 

ـ هر کال په کې د نوي کال مراسم په اورلوبو سره ترسره کېږي.

ـ ددې جشن د لیدونکو شمېر په ټوله نړۍ کې نږدې ۲ میلیارده تنو ته رسېږي.