ژباړه ـ ریاض مقامزی
د ناروغیو په تشخیص کې د ناروغ پر بدن څرګندې شوي نښې نښانې خورا مهم نقش لوبوي. روغتیاپالان اکثراً د همدې علايمو پر مټ ناروغي تشخیصوي او د درملنې چارې پیلوي. دا علايم د بدن په بېلابېلو برخو کې تر سترګو کېږي. په لاسونو، پښو، سترګو، سر او يا د بدن په بل هر ځای کې اختلالات د ځينو ناروغيو ښودنه کوي. په دې ليکنه کې موږ يوازې هغه ناروغۍ درپېژنو چې د سترګو په مرسته تشخیص کېدای شي.
د سترګو علایم
سترګه د بدن حساسه برخه ده. کله چې انسان پر ناروغيو اخته کېږي، د بدن په دې برخه کې بېلابېل علایم تر سترګو کېږی. دا نښې نښانې عادي ندي؛ بلکې د یوې ناروغۍ خبر راکوي. ځینې مهم یې پدې ډول دي:
لومړی| د سترګو سوروالی
که ستاسو د سترګو سپين همېشه سور ښکاري، دا پدې معنا ده، چې تاسو الرژي لرئ. دا په حقیقت کې د الرژۍ له لومړنيو علايمو څخه ګڼل کېږي. کېدای شي تاسو له کومو خوړو او یا هم نورو څیزونو سره حساسیت ولرئ او له همدې امله به له دې ستونزې سره مخ یئ. په دې برخه کې توصيه دا ده، چې وړاندې له جدي کېدو یې درملنه وکړئ. تر څو له سختې ځورېدنې خلاص شئ.
دویم| د وروځو رژېدنه
کله چې د کوم کس د ورځو ويښتان رژېږي، عادي یې مه ګڼئ. دا ستونزه تر ډېره په هغو ناروغانو کې لیدل کېږي، چې په تېروئید غده کې یې ستونزه وي. د داسې خلکو لپاره زموږ توصيه دا ده، چې باید ژر تر ژره دې ددې برخې له متخصص سره وويني.
درېیم| د سترګو رنګ بدلېدل
په ځينو ناروغانو کې د سترګو رنګ تت کېږي او یا هم بدلېږي. ددې معنا دا ده، چې د سترګو داخلي سلولونه د شړېدو په حال کې دي. که ژر تر ژره یې درملنه و نه کړئ، شاید خطرناکې پایلې ولري او ډېر مو وځوروي.
څلورم| ناڅاپي ړندېدنه
که ناڅاپه مو سترګو کار پرېښی وي، کېدای شي له مغزي سکتې سره مخ شوي یئ. دا حالت هغه وخت رامنځته کېږي، چې د انسان مغزو ته وینه پوره و نه رسېږي او یا له بندښت سره مخ شي. دا سکته کولای شي د سترګو د کمزورۍ، ړندېدو او له منځه تللو سبب هم شي.
پنځم| دانه
د سترګو په لاندينۍ برخه کې دانه ختل هم له خطره خالي نه ده. دا دانه چې په عامه اصطلاح یې "غولنه" بولي اکثرا عادي وي؛ خو کله ناکله په حقیقت کې سرطان وي او د سترګو د له منځته تللو سبب کېدای شي.
شپږم| د سترګو ژېړوالی
که ستاسو د سترګو ژېړوالی ورځ تر بلې ډېرېږي؛ باید ژر تر ژره له روغتياپال سره ووينئ، تر څو د زېړي ناروغۍ معايناتو مو ترسره کړي. د سترګو ژېړوالی عادي مه ګڼئ. باید له ډاکټر سره ووينئ. له دې ټولو سره ـ سره ددې خطرناکو ناروغيو علایم هم په سترګو کې څرګندېدای شي.
- شکر
- ايډز
- سرطان