رياض مقامزی
که تاسو هم یو له هغو کسانو څخه یئ چې پخپل ژوند کې د پرمختګ هیله لرئ او غواړئ سبا مو تر نن ښه وي، نو حتما دا لیکنه ولولئ. که تاسو په ژوند کې هره هیله لرئ او یادې هیلې ته ورسېدئ نو همدا ستاسو بریا ده؛ مګر دا کار دومره ژر او په اسانۍ نه کېږي. پدې لاره کې به ګڼ خنډونه وي، ستونزې، ننګونې او نورې بندې لارې هم وي. دا چې دا موانع له مخې لرې کړای شئ او پخپل ژوند کې د بریا او پرمختګ خوند وڅکئ، نو دې څيزونو ته جدي اړتیا لرئ.
لومړی| هیله
د بریا او پرمختګ لپاره هیله لرل تر ټولو مهم بلل کېږي. که تاسو خپله هیله وبایلله پدې معنا، چې تاسو نور هېڅ کومه انرژي نه لرئ؛ نو تر هر څه لومړی ښې راتلونکي ته منتظر اوسئ، امیدونه مو ژوندي وساتئ. دا تر ټولو غوره کار دی.
دویم| اراده
له عظم او ارادې پرته حتی لمانځه ته پاڅېدل هم سخت وي؛ نو آیا د یوې لویې موخې لپاره د ارادې درلودل به لا ډېر مهم نه وي؟ يقيناً همداسې ده. د بریا لپاره بل اړین فکټور اراده بلل کېږي.
درېيم| خپل هدف تعقیبول
ځينې خلک د ژوند په اوږدو کې پر ځينو نور غیر ضروري او بې معنا کارونو مصروف شي او پدې توګه اساسي هدف ترې پاتې شي. خو تاسو باید داسې و نه کړئ، تل د خپل هدف په تعقیب کې اوسئ. دا کار تاسو بلې لارې ته له اوښتو ژغوري.
څلورم| بیا ـ بیا هڅه
په ژوند کې له ماتې وروسته باید هېڅکله له هڅو لاس په سر نه شئ. بیا بیا هڅه کوئ آخر هم دا کار یوه پايله لري، هغه دا چې تاسو به خپل هدف ته ورسېږئ.
پنځم| د وخت مدیریت
د وخت بې ځایه نه تېرول، ګټه ترې اخیستل، يو څه پکې زده کول او له یو چاسره نېکي کول هغه کړني دي چې ستاسو وخت له ضایع کېدو ژغوري. نو تل دا ټکی په نظر کې نیسئ. اصلا د وخت مدیریت د ژوند د مدیریت په معنا ده.
شپږم| د ښو ملګرو ټاکل/لرل
د ښو ملګرو لرل په هر لحاظ ښه دي؛ خو هېڅکله د کومې تمې لپاره ملګري مه پیدا کوئ. ښه ملګري پرته له غوښتنې تاسو سره همکاري کوي او تل مو سمې لارې ته رهبري کوي.