۱۷. د سُرخاب بند - لوګر:
دا بند د لوګر په محمدآغه ولسوالۍ کې پر سُرخاب سیند جوړ شوی. د ګوګل مپ انځورونو کې په ۳۴.۱۴۱۲۹۲ ، ۶۹.۲۲۰۲۷۲ د لیدو وړ دی. د دې سیند اوبه د لوګر له ختیځ غرونو سرچینه اخلي او په محمدآغه ولسوالۍ کې، د لوګر اصلي سیند چې کابل ته بهېږي له رسېدو مخکې خلاصېږي. 
د بند د جوړولو چارې لومړی د امان الله خان د واکمنۍ پر مهال (۱۹۲۰) پیل شوې چې بشپړې نشوې. دویم ځل په ۱۹۳۰ کې پیل او ۵ کلونو کې بشپړې شوې. 
د سُرخاب بند ۲۰ متره (له تهداب سره ۲۴ متره) لوړ او ۱۱۴ متره اوږد دی، او له سنګارۍ جوړ شوی.‌ د اوبو زېرمې یې ۱۰ میلیون مترمکعبه ظرفیت درلود چې د وخت په تېرېدو یې ډېره برخه له خاورو ډکه شوې وه. له همدې امله په  ۲۰۰۹ کال کې د چِک جمهوریت PRT ډلې لخوا د پاک کولو او ځینې ترمیماتو چارې یې ترسره شوې. 
د برېښنا شرکت ویبپاڼې د دې بند په اړه غلط معلومات خپاره کړي او د جوړېدو کال یې ۱۹۶۷ ښودلی. خو د کابل پوهنتون د تاریخ استاد ښاغلي شاه محمود په خپل ویبلاګ کې د سُرخاب بند په اړه کره معلومات خپاره کړي دي. 
د سُرخاب بند اوبه یوازې د کرنې لپاره کارېږي او د لوګر اوسېدونکو لپاره ډېر ارزښت لري.
نور بیا!
#دافغانستان_بندونه
https://twitter.com/assemmayar1