د ژمي په یخه هوا کې له دغه وایرس څخه ځان وژغورئ!
92
Khalid Razique
2024-10-11 15:23:15
(جمعه، ۲۰ تله، ۱۴۰۳ ل): نورووایرس (norovirus) یوه ډول ساري ناروغي ده چې د قۍ کولو او اسهال لامل کیږي، د هر عمر وګړي پر دغه ناروغۍ او ویروس اخته کېدلای شي او ډير په اسانه خپریږي.
هغه کسان چې پر نورووایرس اخته وي کولای شي په ملیونونو نور ذرات خپاره کړي او یوازې یو څو ذرې وایروس نور وګړي پر دغه ناروغۍ اخته کوي.
د الجزیرې راپور سره سم د جرمني مشهور پروفیسر «توماس زویفرلاین» وایي، د ژمي یخ موسم کې ګڼ شمېر وایروسونه خپریږي، ددې له جملې څخه یو د نورووایرس دی چې د انسان په هاضمې سیستم حمله کوي.
د جرمني د معدې معالج ډاکټر د نورو وایروس نښې په لاندې ډول څرګندې کړې دي:
قۍ کول
سخت اسهال
په خيټه کې دردونه
د زړه بدوالی
د بدن تودوخې درجه لوړیدل
په غړو کې دردونه
سر درد
په عامه توګه د ستړیا احساس کول
ډاکټر زویفرلاین څرګندوي چې په نورووایرس اخته کېدلو سره په بدن کې د مایعاتو لویه کچه ضایع کیږي، کوم چې په ځانګړي ډول په ماشومانو، امیندوارو میرمنو او لویانو کې د خطر وړ دی.
د یادې ناروغۍ څخه د مخنیوي لپاره باید نظافت مراعات کړل شي، لکه د لاسونو په منظم ډول په صابون پریمنځل، د دروازو او کړکیو لاستي پاک ساتل او داسې نور هغه وسایل چې بېلا بېل لاسونه پرې کیښودل کیږي پاکول پکار دي.
ځکه چې د نورووایرس یوه ساري ناروغي ده چې ډير ژر انتقالیږي، دا د سپری له لارې، ککړ خواړه او پر دغه وایروس اخته ناروغانو سره د تماس له لارې انتقالیدلی شي.
د نورووایرس ضد درمل هم شتون نه لري، ددې لپاره په کار دي چې پورتني کارونه عملي شي، په دې سره ناروغي کمیږي، دغه راز بدن ته مناسب مایعات ورکول، لکه ډيرې اوبه څښل، شین چای څښل، یخني ښوروا چې غوړ کم یا ونلري وخوړل شي، د قۍ بندیدو څخه وروسته دې داسې سپک خوراک وکړل شي چې معده یې په اسانه هضمولی شي.
ليکوونکې : خالد راﺯق
