وخت مو داسې مدیریت کړئ!
1,107
Riaz Muqamzai - ریاض مقامزی
2022-02-09 03:56:19
ليکنه ـ ریاض مقامزی
د وخت مدیریت له تاسو سره مرسته کوي، چې کارونه مو په کمي او کيفيتي لحاظ ښه او عالي شي. پدې توګه به تاسو پخپل شخصي، زده کړيز او کاروباري ژوند کې چټک پرمختګ کوئ. نو که غواړئ بریالی ژوند ولرئ د وخت او فعالیتونو اړوند دا لارښوونې تل په پام کې ونيسئ.
لومړی| د وخت ارزښت ومنئ!
اکثره خلک وخت له سروزرو سره تشبیه کوي؛ خو په حقیقت کې وخت له سروزرو ډېر قیمتي وي. دا ځکه چې که طلا له لاسه ورکړو، بېرته یې موندلای شو؛ خو وخت داسې څه دي، چې هېڅکله یې بېرته نه شو ترلاسه کولای. نو زموږ د لومړنۍ توصیې په توګه دا پخپل فکر او زړه کې ځای کړئ، چې وخت ډېر ارزښناک دی، ډېر! شاید ووایئ چې د وخت مدیریت سخت دی؛ خو داسې نه ده. پدې برخه کې دا خبره کافي ده، چې وايي: "بد خبر دا دی، چې وخت پرواز کوي؛ خو ښه خبر دا دی، چې ته یې پیلوټ یې."
دویم| خوب مو منظم کړئ!
څېړنو ثابته کړې، چې منظم او کافي خوب کول تاسو ته دا وړتیا درکوي، چې وخت مو سم مدیریت کړئ. د خوب په برخه کې دوه خبرې خورا مهمې دي. یوه دا چې تل وخته ویدېږئ او وخته پاڅېږئ. بله دا چې بې خوبي مکوئ. که دا دوه لارښوونې عملي کړئ، تاسو به د کار، زحمت او د وخت د مدیریت پوره وړتيا پيدا کړئ.
درېيم| وخت مدیریت کوونکي اپليكېشن وکاروئ!
د ټیکنالوژۍ پدې زمانه کې باید له داسې اپلیکېشنونو سره بلد اوسئ، چې تاسو ويښوي، وخت درښيي او د خپل کار په یادولو کې درسره مرسته کوي. پدې برخه کې د Timer، Remainder او Alaram نومونه د یادولو وړ دي.
څلورم| ډېره تفریح مکوئ!
د عمر په اکثریتو پړاونو کې انسان تفریح، بنډارونو، شب ګیرو او چکرونو ته لېوالتیا لري؛ خو دا هر څه باید مناسبه اندازه ولري. پدې کارونو کې افراط تاسو د ناکامۍ کندې ته غورځولای شي. نو د یو لوستي انسان په توګه باید له ډېرو بنډارونو، چکرونو او نورو هغو کارونو څخه ځان وساتئ چې ستاسو وخت ضایع کوي.
پنځم| کاري لومړیتوبونه وپېژنئ!
که تاسو هممهاله د څو کارونو په ترسره کولو مجبور یئ؛ نو باید خپل کاري لومړیتوب وپېژنئ. خپل کارونه په ډېر مهم، مهم، عادي او غیر ضروري ډلګیو ووېشئ. پدې توګه به ستاسو په کارونو کې ښه والی راشي او هر کار به مو په سم وخت کې ترسره کړی وي.
شپږم| هممهاله دوه کارونه مکوئ!
شاید ډېرو ته په یوه وخت کې د دوو کارونو ترسره کول له وخت څخه ډېره ګټه اخیستنه ښکاره شي؛ خو دا چاره ستاسو د کار کیفیت ته زیان رسوي. نو په ورته وخت کې د ډېرو کارونو له ترسره کولو ډډه وکړئ. په یوه وخت کې یو کار وکړئ؛ خو سم یې وکړئ.
